Sunday, May 10, 2009

Dr Diwakar Tejaswi Experience as a Loksabha Candidate

Ek humble try se samaj mein ek achcha message gaya. Lekin samaj mein logon ke sonch mein kitna fark parega yeh pata nahin.. Lekin iska yeh matlab nahin ki try karna chor dena hai. Apne level se, apna bina nuksan ke jo ho sakta hai karna chahiye.

Waise Mumbai election public ke jagruk nahin hone ka sabse achcha example hai. Sirf 5 mahine pahle, isi jagah se sirf 9 antakwadi log pure Bharat desh ko 3 din tak ghootne ke bal baitha kar beijjat kie the. Janta us samay bahut akroshit lag rahi thi aur ek ek politician ko gali de rahi thi. Lekin 5 mahine mein sab bhool kar chaddar taan kar Mumbai ke log sote rahe aur vote dene nahin aaye. Is baar Mumbai mein pichle election se bhi 4% kam log vote die. Delhi mein neta log ka sharab pi kar log mast ho gaye aur voting ka % barh gaya. Patna mein bhi paisa aur caste consolidation kaam kia. Humko lagta hai vote theekedar ke alawe caste leaders ke saath bhi paisa aur favour ko le kar setting hota hai. Yeh baat sahi hai ki Indian politics mein ab seedha gundagardi ka jor bahut kam ho gaya hai lekin paisa aur caste do sabse important factors hain. India mein PM se lekar chaprasi tak paisa ke lie kuch bhi karne ko tyar ho sakte hain. Har log principle aur adarshki batein karenge, corruption ki baate karenge, politicians ko gaali denge, caste system ki burai karenge lekin samay aane par do rupaye ke lie khud bhi bikne ko tyar ho jayenge.

Election ke baad MP khareed farokht ka bazaar garm ho jayega. Hajaar crore rupaye ka adaan pradan hoga. Election ke samay aur uske baad jo kharch hoga use to sarkar banane ke baad vasulna hoga. Corruption kaise kam hoga? Corruption ka ek nexus hai jo start hi politics se hota hai. Election ke samay aur uske baad hua kharch iska buniuyad hai. Jo bhi contractors aur business groups election aur uske baad kharch karte hain woh sarkar se uska kai guna jyada wapas lete hain hajaron crore ke contract aur business mein. Iske main beneficiary hote hain Business people, contractors, ministers, public servants aur agents. Yeh pura nexus bahut dinon se paisa consolidate kie ja raha hai. Nateeja hai poor infratsructure, a big % of population below poverty line, a handful of stinking rich business men & politicians.

Ameer aur gareeb ke beech khai bdhta hi ja raha hai. Kuch log Delhi aur Mumbai mein khuch building aur sadak ko dekh kar chakachondh ho jaate hain aur is bhram mein pad jaate hain ki vikas ho raha hai. Politician log yeh sab batein kar ke bhram bhi paida karte hain. 6% aur 8% se GDP to badh raha hai lekin fayada mutthi bhar logon ko hi ho raha hai. ek tihai janta ko aaj bhi bhar pet khana bhi naseeb nahin hota hai. Aadhe logon ko peene layak paani (baaki logon ke paas aquaguard hai) aur medicine nahin uplabdh hai. In sab ke lie neta log akele jimmewar nahin hain balki har woh aadmi jimmewar hai jo desh ki halat ko dhyan mein nahin rakh kar apne fayede aur caste ke lie vote karta hai. Har woh aadmi desh ki durdasha ke lie jimmedar hai jo is corrupt system ka part hai.6 aur 8% se vikas se prasann hone ki jarurat nahin hai. Agar pocket mein 2 rupay hon to 1 rupay ki badhat bhi 50% ki badhat hai. Important hai yeh dekhna ki apne potential ke hisaab se desh pragati kar raha hai ya nahin. Desh ka development pure samaj ko fayada pahuncha raha hai ya nahin. Development sustainable hai ya nahin. Development ke saath ek sohardyapurn aur positive environment ban raha hai nahin.

Janta ko jagna hoga. Itne saare bomb blasts, Mumbai mein atankwadion ke hathon beijjati aur har din ke problems to public ko nahin jaga pa rahi hai. Public mein jagrukta aane mein abhi samay lageaga. Lekin aisa na ho ki kafi der ho jaye. Kyonki desh ko kafi risk ghere hain. Abhi to yeh sab chote lagenge lekin baad mein bade bhi ho sakte hain (ya baad mein log isse used to ho jayein jaise atankwadi hamlon se ho gaye hain).

Desh ke inefficient aur corrupt system ke karan yeh sab main risks hain:1. Terrorism: Current system cannot prevent terrrorism because it is almost impossible to track black money from different sources. Politicians, terrorists, government officers, businessmen, drug dealers ka paisa black money mein ek sath move karta hai. Jo bhi country terrorists ka paisa rok payega wahi terrorist attack rok payega. Yeh to ho gayee pahle level ki baat. Jo bhi abhi corruption ha halat janta hai woh yeh bhi janta hoga ki terrorists paisa kharch kar ke India mein kuch bhi kara sakte hai (jaise fake id, driving license, firearm smuggling, local support, secret and sensitive information). Aane wale salon mein yeh bahut hi bada khtra ke roop mein ubhar sakta hai. Kyonki Pakistan ka halat kharab hi hota ja raha hai. Bahut saare terrorists border par tyar baithe hain.2. Seperatism: Yeh to already har tarf dikh raha hai. Lekin unhi rajyon mein iska asar pata chal raha hai jahan log isse directly affected hain.3. Law & Order Situation: Ameer aur Gareeb ke beech khai badhne se yeh problem bahut bada ho sakta hai. Abhi tak sarkar aur iske sabhi hisse paise batorne mein joote hain. Kuch tukre gareebon ke taraf fenk kar unhe khush rakhte hain. Lekin jealousy ke wajah se aur asantushti ke wajah se organized aur unorganized yeh log bhi kuch hissa lootne ki koshish kar sakte hai. Mujhe to lagta hai mowadi problem ke root mein kahin na kahin yeh baat jarur hai. Waise maowadi problem chota nahin hai lekin isi tarah ka problem different parts mein different tarike se manifest ho sakta hai.

Common man ki problems ke baare mein baat karne ki to jarurat hi nahin hai. Har koi janta hai ki aam aadmi kin kin mushkilon aur frustration se roj gujarta hai. Bachche ke school mein admission se le kar hospital mein bed tak har jagah struggle hi struggle. In sab struggle ki wajah se har aam admi frustation aur gusse se bhara hai. Yeh frustration aur gussa aaspaas ke logon par nikal raha hai. Chor pakdaya bas maar maar kar jaan nikal do. Scooter se kisi ko kharonch lag gaya bus peet peet kar sccoter chalane wale ko peeche baithe aadmi ko bhi maar do. Baaki frustration system ko aur neta ko gaali dene mein nikal do.Agar common man dhyan se soche to woh kuch na kuch kar sakta hai. Lekin woh is baat se avgat hi nahin hai ki apne saare problems aur aane wale problems ke lie woh bhi jimmedar hai. Lekin Hindustan mein ek fashion ho gaya hai ki chaye par baitho aur desh ki durdasha ke lie netaon ko ji bahr ke gaali do aur fir next election mein paisa factor, caste factor aur awe factor par fir usi neta ko chun lo..

2 comments:

Navneet said...

simply mind-blowing core-fact(s). But, ain't we doing the same by posting such blogs... Ain't we putting our frustration on web... just THINK....
of course, the medium is different, but we all are doing the same.
In my view, therez only 3 option in every situation/system:
a) Mix with the system & be benefited
b) Change the SYSTEM - by hook or by crook
c) Leave the SYSTEM....

Nothing more and nothing less as life is very small...

Baljinder said...

After so much efforts for Election Awareness, We people are not getting good results.
I am sad about it.

Bookmark with: